आफ्नो घरेलु मैदानमा पिएसजीको नतिजा उल्टाउने आशा

पेरिस (एजेन्सी) – युइएफए च्याम्पियन्स लिग अन्तर्गत आज अन्तिम १६ को दोस्रो लेगमा साविक विजेता रियल म्याड्रिड पिएसजीसँग भिड्दै छ । पहिलो लेगमा रियलले सान्टियागो बर्नबाउमा ३-१ को जित हांसिल गरेको थियो ।

पिएसजी आज आफ्ना स्टार फरवार्ड नेयमार बिनै मैदानमा उत्रिन बाध्य हुने छ । अघिल्लो हप्ता मार्से विरुद्धको खेलमा नेयमारको खुट्टामा चोट लागेको थियो । नेयमारको स्थान आज अर्जेन्टिनी वेंगर एन्जल डि मारियाले लिने छन् । उनले एडिन्सन काभानी र किलियन बाप्पेलाई अग्रपंक्तिमा सघाउने अपेक्षा गरिएको छ ।

अर्को तर्फ घरेलु लिगमा रियल म्याड्रिड केहि लयमा देखिएको छ । सिजनको खराब सुरुवातपछि रियलले लय समात्न सफल भएको छ । घरेलु लिगको अघिल्लो खेलमा गेटाफेलाई ३-१ ले हराउँदा रियलका स्टार फरवार्ड क्रिस्टियानो रोनाल्डोले दुई गोल गरेका थिए । रियलका समर्थकहरुले पिएसजीको घरेलु मैदानमा पनि रोनाल्डोबाट यस्तै प्रदर्शनको अपेक्षा गरिरहेका छन् । उनलाई अग्रपंक्तिमा ग्यारेथ बेल र करिम बेन्जेमाले साथ दिने सम्भावना रहेको छ ।

रियलले पहिलो लेग ३-१ ले जितेको थियो जसमा पिएसजीले एक महत्त्वपूर्ण अवे गोल हात पारेको थियो । यद्दपी पिएसजीले आज २-० को जित गर्ता गर्न सक्यो भने पिएसजी नै क्वाटरफाइनलमा पुग्ने छ । यी दुई बीचको पछिल्लो ६ खेलमा रियलको ४ जित रहेको छ भने पिएसजीको १ जित रहेको छ । आजको खेल राती साढे १ बजे सुरु हुने छ ।