१०औँ सगरमाथा गोल्ड कपको उपाधि नेपालगञ्ज एफसी जुबेललाई 0 Shares काठमाडौँ। साउदी अरबको राजधानी रियादमा सम्पन्न १०औँ सगरमाथा गोल्ड कप–२०२६ को उपाधि नेपालगञ्ज फुटबल क्लब जुबेलले जितेको छ। सगरमाथा फुटबल क्लबको आयोजनामा मुस्लिम धर्मावलम्बीहरूको दोस्रो महान पर्व बकर ईदको अवसरमा आयोजित प्रतियोगिताको फाइनलमा नेपालगञ्ज एफसी जुबेलले नवदिप फुटबल क्लबलाई पेनाल्टी सुटआउटमा ४–३ गोलले पराजित गर्दै च्याम्पियन बन्न सफल भएको हो। मे २८ र २९ मा रियादस्थित राबिया खेल मैदानमा सम्पन्न प्रतियोगिताको फाइनल खेल निर्धारित समयमा बराबरीमा सकिएपछि खेलको निर्णय पेनाल्टी सुटआउटमार्फत गरिएको थियो। दुवै टोलीबीच निकै प्रतिस्पर्धात्मक र रोमाञ्चक खेल प्रदर्शन भएको थियो। प्रतियोगितामा साउदी अरबका विभिन्न क्षेत्रहरूमा सक्रिय नेपाली समुदायका १५ वटा फुटबल क्लबहरूको सहभागिता रहेको थियो। प्रतियोगिताको उद्घाटन तथा समापन समारोह नेपाली राजदूतावास रियादकी कार्यवाहक राजदूत सृजना अधिकारीको प्रमुख आतिथ्यतामा सम्पन्न भएको थियो। पुरस्कारतर्फ विजेता नेपालगञ्ज एफसी जुबेलले ७ हजार ५ सय साउदी रियाल नगदसहित ट्रफी र प्रमाणपत्र प्राप्त गरेको छ। उपविजेता नवदिप फुटबल क्लबले ३ हजार ८ सय साउदी रियाल नगद, ट्रफी तथा प्रमाणपत्र हात पारेको छ। विधागत पुरस्कारतर्फ नेपालगञ्ज एफसीका गोलरक्षक उत्कृष्ट गोलकिपर घोषित भए भने उत्कृष्ट फरवार्डको पुरस्कार पनि नेपालगञ्ज एफसीकै खेलाडीले प्राप्त गरे। उत्कृष्ट डिफेन्डरको सम्मान नवदिप फुटबल क्लबका खेलाडीले जितेका छन्। प्रतियोगिताका सर्वाधिक गोलकर्ता मंगोलियन फुटबल क्लबका मनराज गुरुङ घोषित भए। उत्कृष्ट टिम म्यानेजरको पुरस्कार नेपालगञ्ज एफसीका टिम म्यानेजरले प्राप्त गरेका छन् भने उत्कृष्ट प्रशिक्षकको सम्मान नवदिप फुटबल क्लबका प्रशिक्षक छवि देवकोटालाई प्रदान गरिएको छ। प्रतियोगिताभर उत्कृष्ट प्रदर्शन गर्ने खेलाडीहरूलाई ‘म्यान अफ द म्याच’सहित विभिन्न पुरस्कार वितरण गरिएको थियो। उद्घाटन तथा समापन समारोह आयोजक क्लबका अध्यक्ष किरण चौधरीको अध्यक्षतामा सम्पन्न भएको थियो भने कार्यक्रम सञ्चालन नागेश तामाङले गरेका थिए। प्रतियोगिताको सफल र व्यवस्थित आयोजनाका लागि सगरमाथा फुटबल क्लबको व्यापक प्रशंसा गरिएको छ। निष्पक्ष खेल सञ्चालन, उत्कृष्ट व्यवस्थापन तथा भव्य आयोजनाले प्रतियोगिताको गरिमा थप उचो बनाएको सहभागीहरूले बताएका छन्। आयोजक सगरमाथा फुटबल क्लबका सचिव दावा शेर्पाका अनुसार प्रवासी नेपालीहरूबीच आपसी सद्भाव, एकता, सहकार्य तथा स्वस्थ प्रतिस्पर्धाको भावना विकास गर्ने उद्देश्यले प्रतियोगिताको आयोजना गरिएको हो। खेलकुदमार्फत नेपाली पहिचानलाई प्रवर्द्धन गर्नुका साथै युवापुस्तालाई खेल क्षेत्रमा आकर्षित गर्ने लक्ष्यसमेत रहेको उनले बताए। आयोजकका अनुसार विगतका संस्करणहरूझैँ यस वर्षको प्रतियोगिताले पनि रियादस्थित नेपाली समुदायमा खेलकुदप्रतिको आकर्षण बढाउन महत्वपूर्ण भूमिका खेलेको छ। प्रतियोगिताले खेल प्रतिभाको पहिचान, सामाजिक सद्भाव प्रवर्द्धन तथा समुदायबीचको एकतालाई थप मजबुत बनाएको विश्वास व्यक्त गरिएको छ। फाइनल खेल तथा पुरस्कार वितरण समारोहमा उल्लेख्य संख्यामा नेपाली खेलप्रेमीहरूको उपस्थिति रहेको थियो। दर्शकहरूको उत्साहजनक समर्थनले खेलाडीहरूलाई उत्कृष्ट प्रदर्शन गर्न थप ऊर्जा र प्रेरणा प्रदान गरेको आयोजकले जनाएको छ। प्रतियोगिताको मुख्य प्रायोजक नवदिप फुटबल क्लब रहेको थियो भने सह–प्रायोजक सगरमाथा फुटबल क्लब रहेको थियो। साथै, लालीगुराँस रेष्टुरेन्टका सञ्चालक यम तमु, फ्लाई सिटी ट्राभल एन्ड टिकटिङ तथा अन्य विभिन्न प्रायोजक एवं सहयोगी संस्थाहरूको महत्वपूर्ण सहयोग रहेको आयोजकले जनाएको छ। प्रवासको व्यस्त जीवनबीच नेपाली खेलकुदको विकास, खेलाडीहरूको प्रतिभा उजागर गर्ने तथा नेपाली समुदायबीच आपसी एकता, सद्भाव र भाइचाराको भावना सुदृढ गर्ने उद्देश्यले आयोजना गरिएको प्रतियोगिताले उल्लेखनीय सफलता हासिल गरेको आयोजकको भनाइ छ।
