एनएफपीजे फुटसलको उपाधि हाम्रो फुटसल पत्रकार टिमलाई

काठमाडौं ,२५ असार । एनएफपीजे फुटसल प्रतियोगिताको उपाधि हाम्रो फुटसल पत्रकार टिमले जितेको छ । राष्ट्रिय फोटो पत्रकार समूह (एनएफपीजे) को २५ औं स्थापना दिवसको अवसरमा आयोजना गरिएको फुटसल प्रतियोगिताको उपाधि उक्त टिमले जितेको हो । स्वस्तीश्री गुरुकुल विद्यालयको खेलमैदानमा भएको खेलमा १२ वटा टिम सहभागी थिए । नकआउट चरणमा खेलाइएको खेलको पहिलो चरणमा गोलाप्रथाबाट प्रतिस्पर्धा गराइएको थियो ।

प्रतियोगितामा पत्रकार ऋषि धमलाको टिम, शिलापत्र, गोरखापत्र, रासस, हाम्रो जन्मभूमि, नियात्रा टीभी, रेडियो पर्यावरण, फोटोपत्रकार संघ धादिङ, हाम्रो फुटसल टिम, गुरुङ पत्रकार संघलगायतको सहभागिता थियो । दोस्रो चरणमा जितेर आएका ६ टीमबीच प्रतिस्पर्धा गराइएको थियो । सेमिफाइनलमा धादिङ फोटो पत्रकार समूह टीम र एटजोन गुरुङ पत्रकार टीमबीच खेल भएको थियो । हाम्रो फुटसल पत्रकार टिमले बाइ पाएर सीधै फाइनलमा पुगेको थियो ।

सेमिफाइनलमा एटजोनलाई हराएर फाइनल पुगेको धादिङ टीमलाई ४(२ गोल अन्तरले हराउँदै हाम्रो फुटसल पत्रकार टीमले उपाधि हात पारेको हो । १५ मिनेटको खेलमा हाम्रो फुटसल टीमका बासु अवाल र आशिष पुडासैनीले २–२ गोल गरेका थिए । म्यान अफ दी म्याच बासु अवाल भए ।

उत्कृष्ट गोलकिपर धादिङ फोटोपत्रकार संघका श्रीकृष्ण भण्डारीले पाउन सफल भए । साथै संस्थाका अध्यक्ष प्रदीपराज वन्तले विजेताहरूलाई मेडल, ट्रफी र प्रमाणपत्र वितरण गरेका थिए ।