गठबन्धन दलका शीर्ष नेताहरूको अपिल : तालमेल गरेर अघि बढौं

काठमाडौं । पाँच दलीय गठबन्धनका शीर्ष नेताहरूले आसन्न स्थानीय तह निर्वाचनमा तालमेल गरेर अघि बढ्ने बताएका छन् ।

प्रधानमन्त्रीसमेत रहेका कांग्रेस सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल (प्रचण्ड), नेकपा एकीकृत समाजवादीका अध्यक्ष माधवकुमार नेपाल, जनता समाजवादी पार्टीका वरिष्ठ नेता अशोक राई र राष्ट्रिय जनमोर्चाकी उपाध्यक्ष दुर्गा पौडेलले आज एक अपिल जारी गर्दै यस्तो बताएका हुन् ।

‘देशैभर ठाउँ र अवस्थाअनुसार चुनावी तालमेल मिलाएर चुनावमा जान आपसी सहकार्य र परस्पर सहयोगको भावनाले अघि बढ्न पाँच दलका सम्पूर्ण साथीहरूलाई आह्वान गर्दछौँ,’ पाँच नेताले हस्ताक्षर गरेको अपिलमा भनिएको छ ।

गठबन्धनले १७ चैतको बैठकमा आगामी चुनावमा तालमेल गर्ने निर्णय गरेको थियो ।