ओखलढुंगाको एक विद्यालयमा शेर्पा जातिको पोसाक अनिवार्य

काठमाडौं २० फागुन / ओखलढुंगाको एक सामुदायिक विद्यालयले पहिचान संरक्षणका लागि विद्यालय स्तरमा जातीय पोशाकलाई अनिवार्य गरेको छ । जिल्लाको खजीदेम्बा गाउँपालिका ९ पात्ले स्थित जनता आधारभूत बिद्यालयले जातीय पहिचान संरक्षणका लागि शेर्पा जातिको पोशाकलाई अनिवार्य गरेको हो । कक्षा ८ सम्म पढाइ हुने उक्त विद्यालयका एक सय विद्यार्थी र ९ शिक्षकले यो पोसाक लगाउन सुरु गरेका हुन्।

स्थानीय पहिचारनलाई संरक्षण र सम्वर्द्धन गर्न विद्यालयले हप्ताको दुईदिन अनिवार्य रुपमा शेर्पा जातीको पहिचान झल्कने पोशाकलाई अनिवार्य गरेको छ । विद्यालय व्यवस्थापन समितीको निर्णयअनुसार प्रत्येक हप्ताको दुई दिन मङ्‌गलबार र बुधबार शेर्पा जातिको पहिचानयुक्त पोशाक अनिवार्य गरिएको हो ।

आधुनिकता र सामाजिक सञ्जालले बालबालिकाले आवश्यकताभन्दा फरक पोसाक लगाउने गर्दा समाजमा नकारात्मक सन्देश जाने र आफ्नो जातीय भेषभूषाको संरक्षण विद्यालयस्तरबाटै गर्न शेर्पा पोसाकको व्यवस्था गरेको विद्यालय व्यवस्थापन समितिका अध्यक्ष पेम्बा शेर्पाले जानकारी दिए ।
यस वर्ष पहिलोपटक भएकाले सुरुमा उनी आफैंले ३ लाख ५० हजार लगानी गरेर एक सय विद्यार्थी र ९ शिक्षकलाई पोसाक उपलब्ध गराइएको उनले बताए।

विद्यालयले आइतबार र सोमबार नेपाल सरकारले तोकेको, मङ्‌गलबार, बुधबार शेर्पा र बिहीबार र शुक्रबार खेलकुद पोसाक लगाउनुपर्ने व्यवस्था गरेको छ। शेर्पा विद्यार्थीमात्र रहेको विद्यालयमा शिक्षकलेसमेत अनिवार्य लगाउनुपर्ने व्यवस्था गरेको छ। यसरी जातीय पोसाक प्रयोग गर्ने यो ओखलढुङगाको पहिलो विद्यालय हो।