ताप्लेजुङमा पन्ध्र सय सवारी कारबाही

ताप्लेजुङ साउन ११ / जिल्ला ट्राफिक प्रहरी कार्यालय ताप्लेजुङले एक वर्षको अवधिमा पन्ध्र सय सवारी साधनलाई कारबाही गरेको छ । ट्राफिक प्रहरीले आर्थिक वर्ष २०७५÷७६ मा ट्राफिक नियम उल्लङ्घन गर्ने उक्त सङ्ख्यामा सवारी साधनलाई कारबाही गरेको हो ।

ताप्लेजुङमा ट्राफिक प्रहरीको पछिल्लो प्रगतिलाई हेर्दा अघिल्लो वर्षभन्दा उल्लेख्य सफलता प्राप्त गरेको छ । आव २०७५÷७६ मा ट्राफिक प्रहरी कार्यालयले एक हजार ५०० सवारी तथा चालकलाई कारबाही गरेको जनाएको छ । सवारी कारबाहीसँगै ट्राफिक नियम उल्लङ्घन गर्नेमाथि गरिएको कारबाहीबाट नौ लाख २३ हजार रुपियाँ राजस्व पनि सङ्कलन गरेको जिल्ला ट्राफिक प्रहरी कार्यालयले जानकारी दिएको छ ।

ट्राफिक प्रहरी कार्यालय सवारी फाँटका प्रहरी जवान सागर दाहालका अनुसार आव २०७५÷७६ मा सवारी नियम उल्लङ्घन गर्ने १६ वटा बस, ११० वटा ट्रक, ३६१ वटा जिप, १६५ वटा ट्रयाक्टर, ८३८ वटा मोटरसाइकल र १० वटा अटो (टेम्पो) का चालक तथा सवारी धनी कारबाहीमा परेका छन् ।

अघिल्लो आव २०७४÷७५ मा भने एक हजार २०७ वटा सवारी, चालक र सवारीधनी कारबाहीमा परेका दाहालले जानकारी दिनुभयो । उहाँका अनुसार उक्ता वर्ष छ लाख ६१ हजार ५०० रुपियाँ राजस्व सङ्कलन भएको थियो ।