जिल्ला स्तरीय बुद्धिचाल प्रतियोगितामा प्रथम भए शेम सुब्बा

काठमाडौं । तमु ल्होसारको अवसरमा ताप्लेजुङमा जिल्ला स्तरीय बुद्धिचाल प्रतियोगिता सम्पन्न भएको छ । उक्त प्रतियोगितामा शेम सुब्बा प्रथम भएका छन् । तमु ल्होसार मुल आयोजक समिति र ताप्लेजुङ बुद्धिचाल संघको समन्वयमा सञ्चालित खेलमा सुब्बाले ७ ओटै चरणका खेलमा विजय प्राप्त गर्दै प्रथम भएका हुन् ।

प्रतियोगितामा राजकुमार गुरुङ दोश्रो, राज कुमार पन्दाक तेश्रो भएका छन् । प्रतियोगिताको विजेता सुब्बाले १० हजार, गुरुङले ७ हजार ५ सय र पन्दाकले ५ हजार रुपैँया सहित ट्रफि, मेडल र प्रमाण पत्र प्राप्त गरेका छन् । पुरस्कारहरु भीमकाली गुल्मको प्राङगणमा आयोजना गरिएको ल्होसार कार्यक्रममा वितरण गरिएको आयोजकले जनाएको छ ।

खेल संयोजक राजकुमार गुरुङका अनुसार बुधबारबाट ताप्लेजुङ उद्योग वाणिज्य संघको सभाहलमा सुरु भएको प्रतियोगितामा २७ जना खेलाडीको सहभागीता रहेको थियो ।