कांग्रेसले ओली सरकारमा भ्रष्टाचार भएको भन्दै पुस्तिका प्रकाशन गरी गाउँगाउँमा पुर्‍यायो

काठमाडौं । नेपाली कांग्रेसले तत्कालीन नेकपा ९एमाले०का अध्यक्ष केपी शर्मा ओलीको पालामा विवादमा परेका विषयलाई भ्रष्टाचार भएको भन्दै पुस्तिका नै प्रकाशन गरेर गाउँगाउँमा पुर्‍याएको छ ।

‘घर-घर जाऔं, कांग्रेस जिताऔं’ अभियान अन्तर्गत धेरै जसो जिल्लामा पुस्तिका नै बनाएर एमाले सरकारको पालामा भ्रष्टचार भएको भन्दै पुस्तिका बनाएर गाउँ पुर्‍याएको हो ।

सो अभियान अन्तर्गत तत्कालीन प्रधानमन्त्री ओलीले संविधानले नदिएको अधिकार प्रयोग गरी दुई–दुई पटक गर्नुभएको प्रतिनिधिसभा विघटनको सिफारिस अदालतले बदर गरेपछि संविधान बचाउन कांग्रेसले अन्य दलको अनुरोधमा सरकारको नेतृत्व सम्हाल्ने अवस्था आएको कुरा जनतालाई बुझाउन यो अभियान सफल भएको कांग्रेसको निष्कर्ष छ ।

कांग्रेसको सो अभियानका गत २९ फागुनवाट सुरु गरेर चैत २९ गते समापन भएको थियो । कांग्रेस प्रवक्ता प्रकाशशरण महतका अनुसार ६ हजार ७ सय ४३ वटा वडामा नै कांग्रेसका नेताहरू पुगेर पार्टीको पक्षमा माहौल सिर्जना गराउन सफल भएका छन् ।