प्रेम प्रस्ताव नमानेको भन्दै १५ वर्षिया किशोरीमाथि एसिड प्रहार

काठमाडौं भदौ २० प्रेम प्रस्ताव अस्वीकार गरेको भन्दै शुक्रबार बिहानै १५ वर्षीया किशोरीमाथि एसिड प्रहार भएको छ । पर्साको वीरगञ्ज नगरपालिका वडा नम्बर ६ गणेशमान चौकमा शुक्रबार बिहान ६ तिर १५ वर्षीया मुस्कान खातुनमाथि एसिड प्रहार भएको हो । खातुन वीरगञ्जमा मामाघरमा बस्दै आएकी थिइन् ।

पर्सा वीरगञ्ज महानगरपालिका वडा नम्बर २ छप्कैया बस्ने १६ वर्षका सम्साद मिया र सोही उमेरका माजिद आलमले खातुनमाथि एसिड प्रहार गर्दा उनको दाहिने गाला, छाती र हात जलेको एसपी सोमेन्द्रसिंह राठौरले जानकारी दिए । राठौरका अनुसार मुस्कानलाई कीर्तिपुरस्थित फेक्ट अस्पतालमा उपचारका लागि पठाउने तयारी भइरहेको बताएको छ ।

प्रहरीले एसिड प्रहारमा संलग्न मुख्य व्यक्ति सम्साद मियालाई पक्राउ गरेर अनुसन्धान गरिरहेको छ । अर्का माजिद आलम भने फरार रहेका छन् ।