प्रधानमन्त्रीलाई भेट्न वामदेव गौतम सिंगापुर जाँदै

काठमाडौं भदौ १८ / सिंगापुरमा उपचाररत प्रधानमन्त्री केपी शर्मा ओलीलाई भेट्न गौतम दिउँसो १ बजे सिंगापुर प्रस्थान गर्न लागेको उनको नीजि सचिवालयले जनाएको छ। वामदेव निकट स्रोतका अनुसार उनी प्रधानमन्त्री केपी शर्मा ओलीले बोलाएपछि सिंगापुर जान लागेका हुन्।

‘उहाँ सिंगापुर नजाने भनेर बस्नुभएको थियो, प्रधानमन्त्रीबाटै बोलावट भयो, त्यसैले आज सिंगापुर जाँदै हुनुहुन्छ, प्रधानमन्त्रीलाई लिएरै फर्किनुहुनेछ,’ गौतम निकट स्रोतले भन्यो।

उपचारका लागि गत ५ गते सिंगापुर गएका प्रधानमन्त्री ओलीलाई भेट्न नेकपाका महासचिव विष्णु पौडेल मंगलबार नै सिंगापुर गइसकेका छन्। सिंगापुरको नेशनल युनिभर्सिटी हस्पिटलमा उपचार गराइरहेका ओलीको बुधबार अन्तिम अर्थात् सातौँ प्लाज्मा फेरिसस गरिँदैछ। अहिलेसम्मको कार्यतालिका अनुसार प्रधानमन्त्री ओली शुक्रबार नेपाल फर्किँदै छन्।