गुण्डा नाइके दावा लामा दिल्ली एयरपोर्टबाट पक्राउ

काठमाडौ‌ भदौ १७,/ कांग्रेस भातृ संगठन तरुण दलका काभ्रे जिल्ला अध्यक्ष दावा भनिने जितेन्द्र तामाङ भारतको नयाँ दिल्लीस्थित इन्दिरागान्धी अन्तर्राष्ट्रिय विमानस्थलमा पक्राउ परेका छन्। सिलगुडीस्थित बागडोगरा विमानस्थ उड्न लागेका उनलाई दिल्ली प्रहरीले इन्दिरा गान्धी अन्तर्राष्ट्रिय विमानस्थलको ३ नम्बर टर्मिनलबाट पक्राउ गरेको हो।

भारतीय प्रहरीका अनुसार लामासहित अन्य तीन जना विमानस्थलमा रहे पनि दुईजना मात्रै पक्राउ परेका छन्। पक्राउ परेका दुवै जनालाई एयरपोर्ट नजिकैको दिल्ली पुलिसको थानामा राखिएको छ। उच्च स्रोतका अनुसार लामालाई सुराकीको आधारमा समातिएको हो।

लामा तरुण दल काभ्रेका कार्यबाहक अध्यक्ष समेत हुन्। लामालाई पक्राउ गरिएकोमा नेपाली कांग्रेसको भातृ संगठन तरण दलले विरोध गर्दै सकुशल रिहा गर्न माग गरेको छ।

कोलकतामा भएको कुटपिट घटनामा पश्चिम बंगाल प्रहरीले लामालाई खोजिरहेको थियो। उनको संलग्नता जाली नोटको कारोबारमा समेत हुनसक्ने दिल्ली प्रहरीले जनाएको छ।

अनलाईन सट्टेबाजी अभियोगमा नेपाल प्रहरीले पनि लामालाई खोजी सूचीमा राखेको छ। आजको कान्तिपुर दैनिकमा यो खबर छपिएको छ ।