आँखा शिविरबाट तीन सय बढी लाभान्वित

ताप्लेजुङ संबाददाता

ताप्लेजुङ, २२ जेठ / ताप्लेजुङमा सञ्चालित दुई दिने आँखा शिविरमार्फत तीन सय बढी विरामी लाभाविन्त बनेका छन् । नेपाल नेत्र ज्योति सङ्घ ताप्लेजुङले आइतबार र सोमबार दुई दिन सञ्चालन गरेको आँखा शिविरमा कुल तीन सय २६ जनाले उपचार गराएका छन् ।

शिविरमा ३४ जना आँखाका बिरामीको शल्यक्रिया समेत गरिएको डिचेन डोङ्ला स्मारक आँखा उपचार केन्द्रका इञ्चार्ज काजी गुरुङले जानकारी दिनुभयो । गुरुङका अनुसार उक्त सङख्यामध्ये ३३ जनाको मोतियाबिन्दु र एक जनाको साधारण शल्यक्रिया गरिएको हो । शिविरमा धनकुटास्थित रामप्रसाद पोखरेल आँखा उपचार केन्द्रका डाक्टर नन्दा गुरुङ नेतृत्वको टोलीले आँखाका विरामीहरुको शल्यक्रिया साथै उपचार गरेको पनि उहाँले बताउनुभयो ।

यता वर्षायामको समय भएकोले आँखा रोगीको न्यून उपस्थिति हुने अनुमान गरिए पनि उल्लेख्य मात्रामा बिरामीले आँखा उपचार तथा परीक्षण गराएका आयोजक नेपाल नेत्र ज्योति सङ्घ ताप्लेजुङका सभापति मुक्तिराज पौडेलले बताउनुभयो । आँखाका विरामीलाई प्रत्यक्ष लाभ पु¥याउने उद्देश्यले सङ्घले वर्षमा कम्तिमा दुई पटक सर्जिकल सेवासहितको शिविर सञ्चालन गर्दै आएको पनि पौडेलले जानकारी दिनुभयो ।