सन्दिपले दिल्ली डेयर डेभिल्स्लाई धन्यवाद सहित गरे यस्तो ट्वीट

काठमाडौँ /  पहिलो प्रवेशमै उत्कृष्ट इण्डियन्स् प्रिमियर लिग (आइपीएल)मा खेल प्रदर्शन गर्न सफल नेपाली लेग स्पीनर युवा खेलाडी सन्दिप लामिछानेले दिल्ली डेयर डेभिल्स्लाई धन्यवाद व्यक्त गरेका छन्।

उनले आइतबार भएको खेलपछि आफ्नो वालमा ट्वीट गर्दै डेयर डेभिल्सलाई धन्यवाद व्यक्त गरेका हुन्। उनले ट्वीट मार्फत भने ‘मलाई विश्वास गर्दै आइपीएल खेल्न अवसर दिएकोमा म दिल्ली डेयर डेभिल्स्लाई धन्यवाद व्यक्त गर्न चाहान्छु।’

उनले ट्वीटमा यो पनि लेखेका छन् कि ‘आइपिएलका लागि यहाँ रहँदा नयाँ नयाँ कुरा सिक्न र देखाउन पाए। साथै यो यात्रालाई सफल पार्न मेरो साथमा रहेर मलाई सहयोग गर्नुहुने सम्पूर्णलाई धन्यवाद दिन चाहान्छु।’

उनको यस्तो ट्वीटपछि बिश्वभर छरिएर रहेका उनका फेनहरुले उनलाई बधाई तथा शुभकामना दिनेको ओइरो नै लागेको छ। सन्दिप लामिछाने आइपीएल खेल्ने पहिलो नेपाली खेलाडी हुन्। उनले आइपीएलमा डेयर डेभिल्स्बाट तीन खेल मात्र खेल्न पाए। तर पनि उनले तीनै खेलमा उत्कृष्ट खेल प्रदर्शन गरेका छन्।