सिदिङवा ५ को नवनिर्मित भवनको उद्घाटन 

देवेन्द्र बानियाँ 

ताप्लेजुङ । ताप्लेजुङको सिदिङवा गाउँपालिका वडा नं. ५ लिम्बूदिनको नव निर्मित भवनको उद्घाटन गरिएको छ । गाउँपालिका अध्यक्ष मान बहादुर राई र उपाध्यक्ष विष्णु कुमारी कडरिया (बन्दनाले) संयुक्त रुपमा बुधबार उक्त भवनको उद्घाटन गरेका हुन् । 

निर्माण सुरु गरिएको ३ वर्ष पछि भवनको उद्घाटन गरिएको वडा अध्यक्ष अम्बर लिम्बूले जानकारी दिएका छन् । उनको अनुसार उक्त भवनको निर्माण कार्य वि.स. २०७७ असार बाट सुरु गरिएको थियो । 

दुई तले भवनमा जम्मा सात वटा कोठा रहेको छ । कुल ९२ लाख ३५ हजार ४ सय २४ रुपैयाँको लागतमा भवनको निर्माण सम्पन्न भएको हो । 

पालिकाका वडाहरुको भवन निर्माण भएकोमा आफू निकै खुसी भएको र समृद्ध सिदिङ्वा बनाउन आफूहरू वडा तहदेखि नै लागि पर्ने सिदिङवा गाउँपालिका अध्यक्ष मान बहादुर राईले बताएका छन् । यस्तै उनले आफ्नो पालीका आफै राम्रो बनाउँन सम्पूर्ण पालिका बासिलाई अपिल पनि गरेका छन् । 

समग्र पालिका बासीहरूको साथ सहयोगले उक्त भवनको निर्माण सम्पन्न भएको उपाध्यक्ष कृष्ण कुमारी कडरिया (बन्दना)ले बताएकी छन् ।