फुटबल संघ ताप्लेजुङको अध्यक्षमा अशोक चेम्जोङ निर्वाचित

काठमाडौं । जिल्ला फुटबल संघ ताप्लेजुङको नयाँ अध्यक्षमा अशोक चेम्जोङ निर्वाचित भएका छन् ।

आगामी चार वर्षे कार्यकालका लागि नयाँ कार्यसमिति छनोट गर्न बुधबार भएको चुनावी साधारण सभाबाट चेम्जोङको नेतृत्वमा १५ सदस्यीय नयाँ कार्यसमिति चयन भएको हो ।

एन्फाले खटाएका केन्द्रीय पर्यवेक्षक रवीन्द्र जोशीको रोहबरमा भएको चुनावमा निवर्तमान अध्यक्ष साँवाले २ तथा चेम्जोङले ११ मत प्राप्त गरे । अध्यक्ष पदका लागि भएको मतदानमा एक मत बदर भएको थियो । यस्तै उपाध्यक्षमा नरेन्द्र लिम्बु, दिपेन आङ्बुहाङ, शैलेन्द्र गुरुङ निर्वाचित हुँदा अशोक थेवे पराजित भएका छन् ।

सदस्यमा खगेनसिंह हाङगाम, चन्द्र कुमार थेवे, लाक्पा शेर्पा, युवराज लाबुङ, मनोज लिम्बु, रुपेश लिक्बु लेछर्वो, दिल कुमार फुरुम्बु, अशेक लिम्बु र विन्दु प्रसाद तामाङ निर्विरोध चयन हुँदा महिला सदस्य अर्चना शेर्पा चुनिएका छन् ।